01/08/2006 http://www.shekulli.com.al/

Shqiptarët etnikë, të dëbuar dhe masakruar nga grekët që nga viti 1876, kërkojnë të drejtat në BE

Çamët: Athina të njohë gjenocidin ndaj nesh

PDI thotë se Greqia duhet të kushtëzohet, sikurse Turqia për armenët

Denion Ndrenika

Komuniteti Evropian duhet të kërkojë nga Greqia njohjen e gjenocidit kundër popullatës etnike shqiptare çame. Këtë kërkesë i ka dërguar komisionerit evropian të zgjerimit, Oli Renit (Olli Rehn), Partia për Drejtësi dhe Integrim. Sekretari i përgjithshëm, Amos Dojaka, i tha mbrëmë “Shekullit”, se letra është protokolluar në zyrën e komisionerit evropian të zgjerimit, duke pritur përgjigjen e tij aq më shumë që Olli Rehni e njeh dhe e ka konfirmuar këtë, çështjen çame. Dojaka tha se “ne besojmë se nuk mund të ketë paqe të qëndrueshme pa drejtësi” dhe se “ashtu sikurse i është kërkuar Turqisë njohja e gjenocidit kundër armenëve për të përparuar në anëtarësimin në BE, e njëjta duhet të bëhet edhe ndaj Greqisë”. “Partia për Drejtësi dhe Integrim, duke i kujtuar zoti Rehn se mbështesim nismat evropiane për t’i kërkuar Ankarasë të pranojë gjenocidin e kryer kundër armenëve në vitet 1915-1918, si parakusht për hyrje në Bashkimin Evropian, beson se duhet t’i kërkohet edhe Athinës të pranojë gjenocidin grek të ushtruar kundër popullsisë së pafajshme dhe të pambrojtur çame gjatë viteve 1944-1945”, - thuhet në letrën dërguar komisionerit Rehn. Gjenocidi ndaj shqiptarëve etnikë çamë filloi që nga vitit 1876, kur trupat e ushtrisë greke pushtuan kryeqendrën e krahinës etnike shqiptare të Çamërisë, Artën. Partia për Drejtësi dhe Integrim i referohet si fillim asaj që e quan “strategji” kundër çamëve, viteve të fundit të ekzistencës së Perandorisë Turke, 1915-1918, saktësisht të njëjtës periudhë të gjenocidit kundër armenëve, i njohur në vitet ‘90-të nga Asambleja Kombëtare e Francës. “PDI-ja, duke e informuar Komisionin Evropian se edhe strategjia greke kundër popullsisë çame ka filluar në të njëjtat vite me gjenocidin e kryer ndaj armenëve dhe se ngjarja e dhimbshme historike kundër çamëve dhe parametrat e saj përputhen me përshkrimin që i bën gjenocidit, baza e të dhënave të Komisionit Evropian, ka kërkuar një reagim racional nga ana e vetë Komisionit” - vijohet më tej në letër. PDI-ja gjithashtu përkujton se vitet 1944-1945 janë hapat e fundit të gjenocidit të grekëve kundër popullatës shqiptare etnike çame, periudhë të cilën e ka njohur zyrtarisht Kuvendi i Shqipërisë më 30 qershor 1994, si Dita e Gjenocidit Grek për 27 qershorin 1944 me masakrat e Paramithisë si pikë kulmore (Dekret Presidencial nr. 885 të datës 12.07.1994). Dojaka saktësoi se PDI-ja i është referuar për këtë kërkesë të drejtës ndërkombëtare të popujve që kanë pësuar genocid. Një seancë dëgjimore është zhvilluar me kërkesën e Hilari Klintonit, në Komisionin e Helsinkit në SHBA në shtator 2002 me përfaqësuesin e Komitetit Grek të Helsinkit, Panajotis Dimitras, i cili u vu përballë pyetjes së këshilltarit Çeduik Gour (Chadëick Gore) mbi çështjen çame. Sipas Dojakës, kërkesa e PDI-së i drejtohet KE-së për ta nxitur Greqinë ta bëjë këtë njohje në shenjë të respektit ndaj viktimave të dhunës shoviniste dhe vënies së drejtësisë në vend. Partia për Drejtësi dhe Integrim thotë se është e bindur se Komisioni Evropian nuk ka paragjykime politike në drejtim të kombësive, feve apo shteteve, por vetëm respekton principet universale të së drejtës, ndaj dhe, sipas Dojakës, “PDI-ja është në pritje të reagimeve të nevojshme të lidhura me respektimin e të drejtave themelore të njeriut për popullsinë çame; pra qeveria shqiptare, qeveria greke dhe Komisioni Evropian”.

Oli Ren njohu çështjen çame
Zëvendëspresidenti i Komisionit Evropian, Franco Frattini, i ka përcjellë për shqyrtim dosjen e Partisë për Drejtësi dhe Integrim komisionerit të zgjerimit, Olli Rehnit. Zyra e Fratinit, sipas PDI-së, ka njoftuar më 8 qershor se dokumentacioni i monitorimit të marrëdhënieve greke dhe shqiptare në lidhje me çështjen çame ishte në kabinetin e Rehnit. Në dosje janë përfshirë një kopje në italisht e këtij dokumenti (të monitorimit), Memorandumi i Qershorit 2006, për të cilin PDI-ja dëshiron që të jetë mirëkuptimi, Memorandumi i Emigrantëve Çamë në Shqipëri dërguar Këshillit të Sigurimit të Kombeve të Bashkuara në vitin 1947, raporti i gjendjes së minoriteteve në Greqi dhe në Shqipëri si dhe evidenca të paraqitura nga profesori James Pettifer i Akademisë së Mbrojtjes të Britanisë së Madhe. Mandej, Dirk Lange, shefi i kabinetit të Renit, i ngarkuar nga komisioneri i zgjerimit ktheu përgjigjen:
Dëshiroj t’ju falënderoj për letrën adresuar komisionerit Frattini nga ju në datë 29 mars, e cila bën fjalë për çështjen e popullsisë çame. Ashtu siç shkruhet edhe në letrën e dërguar më 12 prillin e kaluar nga zyra e komisionerit Frattini, marrëdhëniet me Shqipërinë do të hyjnë në kompetencat e komisionerit Rehn. Madje, komisioneri Rehn më kërkoi t’ju përgjigjem. Komisioni është në dijeni për çështjen relative të popullsisë çame dhe për më tepër, është plotësisht i informuar për çështjen e rishikimit të të drejtave të anëtarëve, në veçanti të drejtat për pronën e konfiskuar në fund të Luftës së Dytë Botërore. Komisioni mendon se një çështje e tillë duhet të jetë në thelb me natyrë bilaterale ndërmjet Shqipërisë dhe Greqisë. Por, përveç kësaj, komisioni do të vazhdojë të ndjekë me vëmendje zhvillimet e situatës dhe do të vazhdojë të ngrejë zërin për një avancim të dialogut ndërmjet dy shteteve për të arritur në një zgjidhje të favorshme të çështjes.
Dirk Lange, shef kabineti

http://www.shekulli.com.al/ 29/07/2006

Pas konsultimeve me partitë politike dhe Këshillin e të Urtëve, presidenti dekreton mendimet e republikanëve

Moisiu dekreton ndryshimet në ligjin e pronave

E.J

TIRANË- Presidenti i Republikës, Alfred Moisiu, dekreton ligjin për kthimin dhe kompensimin e pronave. Pas shumë këshillimesh me partitë dhe faktorë të tjerë, kreu i shtetit ka vendosur dje, që të dekretojë ndryshimet e bëra pak kohë më parë nga mazhoranca, në ligjin e vitit 2004. Ndryshimet e mazhorancës kanë hasur gjatë këtyre ditëve oponencën e opozitës, e cila nuk ka qenë dakord. Shpresat e partive të majta, ishin varur tek presidenti i republikës, i cili dje i dha fund pritjes, duke dekretuar ndyshimet. Më i rëndësishmi nga ndryshimet e bëra nga mazhoranca, është ai i shkrirjes së Komitetit Shtetëror të Kthimit dhe Kompensimit të Pronave dhe kthimit të tij në një agjensi që varet nga qeveria.
Miratimi
Burimet zyrtare të presidencës, pohuan dje se janë dekretuar ndryshimet në ligjin “Për kthimin dhe kompensimin e pronës”. “Presidenti i Republikës, Alfred Moisiu, në respekt të nenit 84/1 të Kushtetutës të Shqipërisë, dekretoi sot ligjin nr. 9583, datë 17.07.2006, “Për disa ndryshime dhe shtesa në ligjin nr. 9235, datë 29.07.2004, “Për kthimin dhe kompensimin e pronës”, të ndryshuar”,- thanë dje burimet zyrtare të presidencës, në lidhje me këtë çështje. Sipas tyre, presidenti Moisiu ka ndjekur me vëmendje dhe respekt pretendimet dhe argumentet e palëve, por duke u mbështetur në argumentet kushtetuese dhe rëndësinë e madhe që ky ligj ka për zhvillimet ekonomike në vend, vendosi ta dekretojë atë. Përpara dekretimit të këtij ligji, kreu i shtetit zhvilloi një takim me Këshillin e të Urtëve. Ai i kërkoi Këshillit, një mendim në lidhje me ndryshimet e miratuara nga Parlamenti, në ligjin “Për kthimin dhe kompensimin e pronave”. Edhe anëtarët e Këshillit të të Urtëve, kanë qenë parimisht dakord me ndryshimet e bëra nga qeveria, në ligjin “Për kthimin dhe kompensimin e pronës”.
Ndryshimet
Amendamentet shtesë të ligjit “Për kthimin dhe kompensimin e pronave”, janë propozuar nga Partia Republikane dhe pak ditë janë miratuar në Parlament me 75 vota-pro nga mazhoranca e djathtë. Në këtë seancë nuk ishte e pranishme opozita, ndërsa e vetmja votë kundra, ishte ajo e avokat Spartak Ngjelës. Ndryshimet e bëra në këtë ligj, tashmë sanksionojnë kthimin e tokës deri në 100 hektarë, kur në ligjin aktual, kthimi ishte në masën 60 hektarë. Të gjitha amendamentet, janë miratuar në bazë të ndryshimeve që ishin bërë sipas neneve nga Komisionet Parlamentare të Ekonomisë dhe të Ligjeve. Ndryshimi thelbësor që do të përmbysë strukturat ekzistuese që merren me kthimin e kompensimin e pronave, është neni që e shndërron Komitetin Shtetëror të Kthimit dhe Kompensimit të Pronave në një Agjenci, e cila do të jetë në varësi të drejtpërdrejtë të Këshillit të Ministrave. Ndërkohë, me këtë ligj, tokat e përmbytura tashmë quhen toka industriale, sipas propozimit të PDK-së.