Tiranë

Mesnata e kaluar ka përcaktuar për të tretën herë rresht skadimin e afatit, kur Komisioni Zgjedhor i Qeverisjes Vendore duhet të kishte paraqitur rezultatin përfundimtar për kryebashkiakun e Tiranës, si dhe këshilltarët e partive politike.

Pothuajse gjatë gjithë javës, puna në KZQV ka qenë e bllokuar dhe si shkak kanë qenë tensionet e krijuara mes komisionerëve socialistë e demokratë, ku këta të fundit ankohen për parregullsi të listave. Duke qenë se nuk kanë arritur dot të marrin një vendim të përbashkët, edhe dje ata i kanë paraqitur një kërkesë kryetarit të Komisionit Qendror të Zgjedhjeve, Ilirjan Celibashi, për të shtyrë afatin e shpalljes së rezultateve në kryeqytet, por pa përcaktuar një datë të caktuar.

Situata në KZQV
Edhe pse Celibashi u vuri në dispozicion kohën e kërkuar për dy herë rresht, që nga data 14 tetor, ku skadoi edhe afati i parë, ndërhyrja e tij pritet të mos ketë efektin e duhur, pasi gjithë problemi është te marrëdhëniet e acaruara mes komisionerëve socialistë dhe demokratë, ku ditët e fundit më tepër bërtasin, sesa flasin. E tillë ishte situata që nga mesdita e djeshme, ku rreth një tavoline të rrumbullakët në ambientet e “Piramidës”, është dashur një punë e madhe që komisionerët të zinin vendet e tyre. Kryetari i KZQV-së, demokrati Perikli Dhales, motivon bllokimin e punës me përpjekjet e kolegëve të tij për të bërë manipulime në numërimin e votave si dhe nga “masakra” e listave që po hasin gjatë shqyrtimit. Por, deklaratën e tij e ka hedhur poshtë nënkryetari socialist, duke u shprehur se “situata e krijuar është si shkak i vonesave të qëllimshme nga ana e vetë demokratëve”. Megjithatë, nga 360 kuti votimi që kanë ardhur në KZQV, vetëm në 31 prej tyre janë nxjerrë rezultatet, por dhe këto 27 kuti kanë qenë me probleme, të cilat do t´i rishqyrtojë një e nga një KQZ-ja. Kurse, gjobat nuk janë aplikuar, pasi hëpërhë, pritet që vetë anëtarët e KZQV-së, të ndërgjegjësohen për të dalë me një vendim të përbashkët.

Ankesat
Veç letrave të njëpasnjëshme të bëra nga KZQV-ja në drejtim të kreut të KQZ-së, Ilirjan Celibashi, ky i fundit duhet të përballet edhe me një sërë ankesash që kanë arritur në adresë të tij. Deri në orët e vona të pasdites pranë KQZ-së, janë paraqitur 40 kërkesa për rinumërim të votave. Sipas zëdhënësit të KQZ-së, Erton Sinani, janë pranuar vetëm ato kërkesa, ku në bazë të Kodit të ri Zgjedhor, diferenca e votave duhet të jetë jo më shumë se 150 vota. Këtë kriter, duket se e kanë përmbushur edhe kandidatët e PS-së dhe PD-së për bashkinë e Himarës, të cilët paraqiteshin me më pak se 100 vota pas PBDNJ-së. Megjithatë, për këtë bashki është kërkuar që zgjedhjet të shpallen të pavlefshme dhe jo thjesht një rinumërim i votave. Në këtë raport është edhe bashkia e Selenicës, ku kandidati i PBDNJ-së, Ilia Seferi, me 541 vota, la pas socialistin Ilir Veizi me 500 vota dhe demokratin Reshat Osmani me 499, por për këtë nuk është është bërë e ditur ndonjë ankesë. Por, kontestimet më të shumta kanë patur të bëjnë me një sërë komunash të niveleve të dyta e të treta. Gjithsesi, surpriza më e fundit ka patur të bëjë me bashkinë e Kamzës, ku PS-ja nuk ka qenë dakord me rezultatin, ndaj ka prezantuar një kërkesë ku të rinumërohen edhe një herë votat nga e para.

KQZ: PS 33.56%, PD 31.88%
Avancojnë rezultatet, shtohen fituesit për PS

Rezultatet më të fundit gjatë 24 orëve të kaluara nga Komisioni Qendror i Zgjedhjeve, kanë përcaktuar më tepër fitues nga kampi “rozë”. Kështu, ata kanë arritur të marrin zyrtarisht edhe bashkinë e Pogradecit me kandidatin e tyre, Artan Shkëmbi, i cili ka rritur të marrë 44.99 për qind të votave. Kurse, kandidati tjetër në Fier, Baftjar Zeqaj, ka qenë edhe më i suksesshëm në garën e 12 tetorit, duke kapur përqindjen 59.57. E njëjta situatë është paraqitur edhe për 2 njësi bashkiake në kryeqytet, ku në Tirana 6, 9, kanë fituar përkatësisht Irfan Dashi me 46.41 për qind dhe Luan Zhegu 56.62 për qind. Por, fati i ka “braktisur” socialistët përsa i përket njësisë bashkiake numër 8, ku sfidanti demokrat Arben Tafaj, ka mundur një Tafaj tjetër, Gencin, duke u prezantuar me 52.45 për qind. Ndërkohë, njësitë 1, 4, 7, 10, nuk kanë sjellë rezultatet pranë KQZ-së, ndërsa 3, 5 janë duke u përpunuar. Në total, 303 KZQV kanë paraqitur rezultatet e tyre pranë KQZ-së.

Deputeti i zonës, organizon një kokteil në TOB
Angjeli, Rama e Ulqini, festë për fitoren e PS në minibashkinë nr.2

Deputeti Anastas Angjeli organizoi dje një takim festiv me rastin e fitores së Partisë Socialiste në minibashkinë numër 2 në kryeqytet, ku doli fitues Përparim Bodinaku. Angjeli si deputet i zonës me rastin e kësaj fitoreje kishte mbledhur një pjesë të mirë të socialistëve të zonës, në një koncert-koktej në Teatrin e Operas dhe Baletit. Pasi falenderoi të gjithë qytetarët që dhanë votën e tyre për PS-në, një përshëndetje Angjeli iu drejtoi edhe aktiviteteve në të gjithë zonën elektorale nr.33 dhe njëkohësisht të Njësisë Bashkiake nr.2.

Angjeli u shpreh se, “kjo ishte një zgjedhje historike mes ftesës për t`u kthyer mbrapsht, në xhunglën urbane pa rregulla e pa kufij e një Tirane që ndryshon dita-ditës, ku gjithsecili ndërton jetën e vet përditë e më shumë dhe përditë e më mirë, duke respektuar dhe nderuar jetën e tjetrit. Në festën e organizuar nga deputeti Anastas Angjeli, përveç disa kandidat minibashkish fitues, ishte i pranishëm edhe Kryetari i Bashkisë së Tiranës, Edi Rama, si dhe kryetari i Partisë Socialiste të Tiranës, Musa Ulqini. Në takim si gjithnjë merrnin pjesë edhe shumë anëtarë të Forumit të Rinisë Eurosocialiste në Shqipëri (FRESSH), të cilët mbajtën një peshë dhe kontribut të veçantë në këto zgjedhje, ashtu si në shumë të tjera më përpara.