http://www.lajmet.com/#1    15/06/2003

Lajmet nga Kosova 
   

1.    Demaçi: Kufijtë ekzistues nuk do të ndryshojnë

   Beograd - Në numrin e fundit të "Novine vranjske", Adem Demaçi, kryetar i Komitetit për Tolerancë dhe Bashkëjetesë në Prishinë, lidhur me konstatimin e një gazetari se tani shqiptarët gjenden në pushtet në Preshevë dhe në Bujanovc, është përgjigjur; "Është e saktë se ata e kanë pushtetin këtu, por atyre u duhet pushteti i vërtetë e jo formal. Nëse e kanë pushtetin e vërtetë, ata edhe do të jenë përgjegjës. Kam përshtypjen se qeveria serbe, nuk ka shumë besim në ta dhe se po i mban nën kontroll". Lidhur me këto rrëfime të cilat kohë pas kohe po paraqiten për këmbimin territorial të jugut të Serbisë për pjesën veriore të Mitrovicës, Demaçi tha: "Nuk besoj se një gjë e tillë mund të ndodhë. Kjo pjesë e Serbisë është mjaft e rëndësishme për të. Gjithashtu, as shqiptarët nuk kanë arsye ta lënë pjesën e territorit të vet për cilëndo pjesë tjetër, kështu që konsideroj se kufijtë ekzitues do të mbeten, me perspektivë që të gjithë të jemi pjesë e Evropës, me kufijtë si vija të thjeshta në harta. Kjo nuk është perspektivë vetëm e jona por edhe e vetë Evropës. Së shpejti BE do t'i ketë 25 anëtare, dhe anëtarësimi na pret edhe ne. Prandaj duhet të jemi të gatshëm që t'i zgjidhim vetë problemet, që Evropa më vonë të mos ketë punë me ne. Mirëpo, jemi skeptikë, sepse nuk shohim ndonjë ndryshim thelbësor të Beogradit ndaj Kosovës"